Vizat u hoqën më 1 janar për shtetasit e Kosovës, mirëpo jo edhe për qytetarët serbë që kanë pasaporta ilegale. Për të udhëtuar në Evropë, mbi 800 serbë kanë aplikuar për t’u pajisur me pasaportë të Kosovës.
Nga Ministria e Punëve të Brendshme kanë thënë se muajve të fundit kanë parë rritje të theksuar të aplikimeve. MPB thotë se kanë material të mjaftueshëm për të pajisur me pasaporta qytetarët që aplikojnë.
Nga 1 janari Kosovës i janë hequr vizat. Të gjithë qytetarët mund të udhëtojnë në shtetet e zonës Shëngen pa pasur nevojë që paraprakisht të pajisen me viza. Mirëpo një gjë e tillë ende nuk vlen për qytetarët serbë të Kosovës që kanë pasaporta të Administratës Koordinuese, të lëshuara nga Serbia.
Për të shfrytëzuar të drejtën e udhëtimit, interesim kanë edhe nga qytetarët serbë të katër komunave veriore.
Vetëm gjatë muajit janar, për t’u pajisur me pasaportë të Kosovës, kanë aplikuar 826 persona. Nga Ministria e Brendshme, për Express, kanë treguar se sa është numri për secilën komunë veçmas.
“Leposaviq 155; Zubin Potok: 125; Zveçan 112; Mitrovicë e Veriut 434”, thuhet në përgjigjen e MPB’së.
Ndërkaq deri më 31 dhjetor të vitit 2023, për pasaportë të Kosovës, kanë aplikuar 6 mijë e 310 qytetarë serbë.