Shkëlzen Ahmeti, djali i Ismet Ahmetit, ish-kryeshefit të Ujësjellësit Rajonal ‘Gjakova’, vazhdon të jetë në arrati për plagosjen e dy afaristëve Driton e Jon Stublla, si dhe një klienti të një kafeneje në Gjakovë.
Policia e Kosovës ka thënë sot se Ahmeti ndodhet ende në arrati nga organet e rendit.
Ai, dyshohet për plagosjen me armë zjarri të pronarëve të kafenesë ‘Republika’ në Gjakovë, si dhe një klienti të këtij lokali, mëngjesin e të dielës.
Në raportin 24-orësh të Policisë thuhet se tre të plagosurit janë jashtë rrezikut për jetë, bazuar në informatat e mjekut kompetent në Spitalin e Gjakovës.
“Raportohet se i dyshuari mashkull kosovar pas një mosmarrëveshje, ka plagosur me armë zjarri tre meshkuj kosovarë. Të plagosurit janë dërguar në Spitalin e Gjakovës dhe sipas mjekut kompetent janë jashtë rrezikut për jetë”, thuhet në raportin policor.
Rasti ndodhi në orët e para të mëngjesit të së dielës.
Zëdhënësi i Policisë për rajonin e Gjakovës, Sheremet Elezaj, tha të dielën se rasti është iniciuar si vrasje në tentativë.
“Aktualisht jemi duke kryer procedurat e nevojshme hetimore në drejtim të zbardhjes së rastit dhe kapjen e të dyshuarit. Në konsultim me prokurorin e shtetit është iniciuar rast ‘vrasje në tentativë’ dhe ‘mbajtje në pronësi, kontroll ose posedim të paautorizuar të armëve’”, tha ai.