Analisti për çështjet e sigurisë, Burim Ramadani ka bërë thirrje që ura e Ibrit të hapet nëpërmjet dialogut të Kosovës me NATO-n dhe jo me Serbinë.
Ai e ka cilësuar të dëmshëm idenë që diskutimi për urën të bëhet nëpërmjet dialogut me Serbinë në Bruksel.
“Rikthimi i idesë për përfshirjen e hapjes së Urës në dialog me Serbinë në Bruksel është edhe i pavend, edhe i dëmshëm, edhe i papranueshëm. Serbia nuk ka dhe nuk duhet të ketë VETO për hapjen e Urës në Ibër”, ka shkruar Ramadani në një postim në Facebook.
Sipas tij, dialogu për këtë çështje në Bruksel (BE) ka përfunduar moti.
“Kosova dhe BE kanë realizuar obligimet e dala nga Marrëveshja. Rikthimi i Urës në dialog është Veto për Serbinë”, ka shkruar ai.
“Ndërsa, për hapjen e Urës së Ibrit, duhet më shumë punë me NATO-n dhe më pak fjalë në media! Hapja e Urës bëhet bashkë me NATO-n dhe KFOR-in”, ka shkruar ai.
Bashkimi Evropian të martën ka paralajmëruar se planifikon takim midis Kosovës dhe Serbisë në të cilët do të flitet për statusin e urës mbi lumin Ibër.
“BE planifikon të vendosë statusin e urës në agjendën e takimit të ardhshëm të Dialogut”, ka thënë zëdhënësja e BE-së, Nabila Masrali.