Mungesa e takimit trepalësh të martën në Bruksel, në kuadër të dialogut po konsiderohet një dëshmi më shumë për dështimin e këtij procesi, nën ndërmjetësimin e emisarit të BE-së, Mirosalv Lajçak. Partitë opozitare, shprehen skeptike se do të ketë diçka konkrete në muajt në vijim drejt zbatimit të Marrëveshjes Bazë të Brukselit dhe Aneksit të Ohrit, derisa Kosova është në prag të zgjedhjeve dhe emisarit Lajçak po i përfundon mandati. Në anën tjetër, në partinë në pushtet, Lëvizjen Vetëvendosje kërkojnë nga Bashkimi Evropian të ketë qasje të balancuar në këtë proces. Sipas tyre, BE-ja duhet të insistojë që Serbia të tërheq letrën ku atakon pikat që ia konfirmojnë shtetësinë Kosovës si dhe të nënshkruajnë ujdinë e Ohrit.
Deputetja e Partisë Demokratike të Kosovës, Blerta Deliu thotë për KosovaPress se Kosova duhet të tregohet palë konstruktive në dialog, mirëpo assesi duke diskutuar tema të brendshme në Bruksel.
Deliu: S’pritet të ketë zhvillime të reja në dialog
“Nuk pres që të ketë zhvillime të reja edhe për shkak të barrikadimit të dy palëve në proces dhe për shkak të kontekstit zgjedhor që do të ketë Kosova me 9 shkurt. Natyrisht do të ishte e rëndësishme që Kosova në proces të dialogut si palë konstruktive dhe e rëndësishme të përfitonte. Zhvillimet e Kosovës dhe Serbisë në dialog do të jenë deteriminuese edhe në çështje të integrimit në Bashkimin Evropian. Procesi i dialogut Kosovë-Serbi do të jetë i determinues edhe për procesin e zgjerimit por edhe të ardhmen tonë integruese. Kosova duhet të jetë e vetëdijshme që të jetë më bashkëpunuese”, thekson Deliu.
Ndërkaq, deputetja e Aleancës për Ardhmërinë e Kosovës(AAK), Time Kadrijaj, deklaron se emisari Lajçak ka tentativa për takime në nivel të kryenegociatorëve vetëm për shkak të arsyetimit të punës së tij, kur është në përfundim të mandatit.
Sipas saj, në këtë proces s’pritet të ketë progres pasi Kosova gjendet veçse në proces zgjedhor, derisa akuzoi kryeministrin Kurti se ka bërë koncesione të mëdha në dialog me pranimin e marrëveshjes së Brukselit dhe draftit për themelimin e Asociacionit të komunave me shumicë serbe.
Kadrijaj: Përpjekjet për takime trepalëshe në Bruksel vetëm për arsyetim të mandatit të Lajçak
“Lajçak po mundohet, meqenëse është në fund të mandatit, pasi tani do të ketë konfiguracion tjetër BE-ja dhe janë në fazën e konstituimit të institucioneve. Ai mundohet të arsyetoi mandatin e vet me përpjekje për takime të ndërsjella, duke ditur se nuk do të pranojnë palët. LVV-ja dhe zotëri Kurti do të mundohen me populizma duke i refuzuar agjendën, ndërsa ne e dina se që katër vite le që ka dialogu, por ka bërë koncesione të mëdha. (Kurti) Ka pasur një dialog pa parime dhe një dialog që nuk ka qenë transparent”, thekson Kadrijaj për KosovaPress.
Në anën tjetër, deputetja e Lëvizjes Vetëvendosje, Arbëreshë Kryeziu-Hyseni, thotë për KosovaPress se pavarësisht tentimeve të Lajçak për takime trepalëshe në nivel të kryenegociatorëve në Bruksel, është koha e fundit që BE-ja të veprojë drejt në dialog, duke i kërkuar Serbisë të nënshkruajë marrëveshjen e Brukselit dhe aneksin e Ohrit dhe të tërheq letrën e dërguar nga ish kryeministrja serbe, Ana Bërnabiq.
Kryeziu-Hyseni: Është koha e fundit që BE-ja të veprojë drejt në proces të dialogut
“Nëse kërkohet që të ketë dialog duhet që të dy palët të pranojnë të njëjtin dokument dhe të qëndrojnë brenda kornizave të atij dokumenti. Nëse njëra palë nuk është aty, unë mendoj se BE-ja duhet të drejtojë orientimin e saj kah kjo palë dhe të bëjë të njëjtën që të rikthehet në marrëveshjen bazike në mënyrë që të ecim përpara më procesin e dialogut. Në të kundërtën nuk kemi ndonjë arsye për dialoguar me një shtet që ka bërë një sulm terrorist për aneksimin e pjesës veriore të Kosovës…Është koha e fundit që Bashkimi Evropian t’i hap sytë dhe të veprojë drejt dhe saktë sa i përket qasjes në procesin e dialogut”, thekson ajo.
Pas dështimit të takimit trepalësh në Bruksel, emisari i BE-së për dialogun Kosovë – Serbi, Miroslav Lajçak, shprehu keqardhjen që s’ka pasur një takim të tillë për të trajtuar siç tha çështjet urgjente.
Kryenegociatori kosovar, Besnik Bislimi akuzoi homologun e tij serb, Petar Petkoviq se takimi s’ka ndodhur për fajin e tij pasi s’ka pranuar agjendën e diskutimit të dakorduar me ndërmjetësin Lajçak. Të njëjtën gjë e bëri edhe Petkoviq ndaj Bislimit.
Krahas këtyre, Bislimi bëri të ditur se Serbia nuk ka tërhequr letrën nga Brukseli, pavarësisht deklaratës së Lajçak në Prishtinë se e njëjta e ka bërë një gjë të tillë.
Pas takimeve bilateraleve të palëve me Lajçak është raportuar se Bislimi dhe Petkoviq kanë pasur takime të ndara edhe në selinë e NATO-s në lidhje me urën kryesore mbi lumin Ibër në Mitrovicë.