Kryeministri i Republikës së Kosovës, Albin Kurti, ka deklaruar se e gëzon fakti që komuniteti egjiptian ka pasur zhvillime pozitive.
Me rastin e shënimit të Ditës së flamurit të komunitetit egjiptian, Kurti ka deklaruar se Qeveria është duke punuar në drejtim të të krijuarit mundësi të barabarta për të gjithë qytetarët.
“Besoj se së bashku kemi shumë për të festuar për komunitetin, por jam këtu edhe për t’i dëgjuar sfidat që ju shihni se mbeten… Më gëzon fakti se ka pasur zhvillime pozitive që nga tryeza e rrumbullakët këtu një vit më parë. Ju falënderoj për gjithë kontributin e dhënë për komunitetin egjiptian në Republikën e Kosovës, për mundësitë për bashkëqeverisje përmes kabinetit tim qeveritar dhe Kuvendit të Kosovës”, tha ai.
closevolume_off
Tutje, ai tregoi se çfarë hapa ka ndërmarrë Qeveria tashmë për krijimin e mundësive të barabarta për të gjithë.
“Tani kemi ndarë edhe 3 milionë euro vetëm për komunitete për OJQ dhe për vende të reja pune në thirrjen që sapo është mbyllur në ministrinë për Komunitete dhe Kthim. Për familjet e komuniteteve që nuk kanë shtëpi apo kanë nevojë për renovime Ministria e Administrimit e Pushtetit Lokal ka ndarë 3 milionë euro, si dhe 1 milionë për projekte infrastrukturore për komunitetet… Qeveria jonë po punon për krijimin e mundësive të barabarta për arsim dhe punësim, arsimi i lartë ofrohen falas për të gjitha komunitetet dhe me ministrin Krasniqi dhe Nagavci jemi dakorduar që të ndajmë 100 bursa për studentët egjiptianë në universitetet publike. Në tetor do të hapet konkursi edhe për 100 bursa të tilla gjithashtu i kemi ndarë 300 mijë euro nga komuniteti”, deklaroi Kurti.