Forca paqeruajtëse e NATO-s KFOR në një përgjigje ka thënë se çdo vendim për hapjen e urës kryesore mbi lumin Ibër duhet të merren në kuadër të dialogut midis Kosovës dhe Serbisë në Bruksel. KFOR-i nuk dashur të komentojë situata hipotetike nëse Qeveria e hapë urën mbi lumin Ibër për qarkullimin e automjeteve, dhe nëse i kërkohet KFOR-it largimi i trupave të tyre që qëndrojnë në urë.
“Lidhur me pyetjen tuaj, ne nuk do të spekulojmë për ndonjë skenar hipotetik. Qëndrimi ynë për këtë çështje ka qenë i qartë, transparent dhe konsistent gjatë gjithë kohës. Çdo vendim në lidhje me hapjen e urës kryesore mbi lumin Ibër duhet të merret në kuadër të dialogut të ndërmjetësuar nga BE-ja ndërmjet Beogradit dhe Prishtinës”, thuhet në përgjigjen e KFOR-it për rtv21.
KFOR-i ka bërë më dije se vazhdon ta ketë praninë fikse në urën e Ibrit.
“Misioni i KFOR-it mban një prani të përhershme, fikse në urë dhe vazhdon të kryejë patrullime të rregullta në zonat përreth për të garantuar stabilitet dhe siguri, për të mirën e të gjitha komuniteteve lokale. Ne nuk do të hezitojmë të trajtojmë çdo zhvillim që mund të ndikojë në mjedisin e sigurisë dhe stabilitetin rajonal, në respekt të plotë të mandatit tonë të OKB-së. KFOR-i vazhdon të zbatojë Rezolutën 1244 të Këshillit të Sigurimit të OKB-së të OKB-së të bazuar në mandatin e tij të vitit 1999 – për të kontribuar në një mjedis të sigurt dhe të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme; duke vepruar si reagues i tretë i sigurisë, në koordinim të ngushtë me Policinë e Kosovës dhe misionin e BE-së për Sundimin e Ligjit (EULEX), të cilët janë përkatësisht reaguesi i parë dhe i dytë i sigurisë”, ka thënë KFOR-i.