Instituti GAP, gjatë ditës së djeshme publikoi një raport në lidhje me mbitërheqjet e kosovarëve nga bankat e Kosovës.
Sipas këtij raporti, del se qytetarët e Kosovës kanë rritur shfrytëzimin e mbitërheqjes që nga viti 2021.
Në vitin 2020, sipas këtij raporti, qytetarët kishin shfrytëzuar 143.2 milionë euro mbitërheqje, ndërsa në vitin 2021, 271.6 milionë euro, një rritje kjo prej gati 130 milionë euro.
Rritja ka vazhduar edhe në vitet pasuese, 2022 dhe 2023. Madje rritja nga viti 2021 (271.6 milionë euro) në raport me 2022 (414.8), është 143.2 milionë euro, aq sa kishin tërhequr në tërësi qytetarët në vitin 2020. Kurse viti 2023 (471.8) po ashtu shënoi rritje të shfrytëzimit të mbitërheqjes, me 57 milionë euro më shumë nga viti paraprak.