Ministri i Punëve të Brendshme të Kosovës, Xhelal Sveçla, lidhur me provokimet që po bën Serbia ndaj Kosovës, ka deklaruar se Serbia e ka shkelur marrëveshjen për menaxhimin e përbashkët të pikave kufitare, duke iu referuar pranisë së katër pjesëtarëve të xhandarmërisë serbe në stacionin policor kufitar në Merdarë.
I pyetur nga mediat nëse këto kërcënime nga Serbia janë dërguar te partnerët ndërkombëtarë, Sveçla theksoi se Serbia nuk është e gatshme për bashkëpunim, pavarësisht marrëveshjeve që ka nënshkruar.
“Ata bëjnë shkelje të marrëveshjes për menaxhimin e përbashkët të pikave kufitare. Nuk është hera e parë që ata bëjnë shkelje të kësaj marrëveshjeje, por shpresojmë të jetë e fundit. Ne patjetër që jemi të gatshëm të ballafaqohemi me çdo shkelje të tyre dhe në të njëjtën kohë t’i prezantojmë ato te partnerët tanë si dëshmi shtesë se Serbia nuk është e gatshme për të bashkëpunuar, pavarësisht marrëveshjeve që ka nënshkruar”, u shpreh Sveçla.
Ministri i Punëve të Brendshme, Xhelal Sveçla, ka theksuar se është shumë e qartë që Kosova është e kërcënuar nga aspiratat hegjemoniste të Serbisë. Sipas tij, i gjithë aparati shtetëror i Serbisë punon për të përmbushur qëllimet e saj, të cilat jo vetëm që janë të papranueshme për Kosovën, por janë edhe kriminale në realitetin tonë. Sveçla nënvizoi se institucionet e Kosovës po forcohen çdo ditë për t’i zmbrapsur këto qëllime të Serbisë në çdo moment, tani dhe në të ardhmen.
“Jam i bindur që këto provokime do të dështojnë. Sigurisht, ato vështirësojnë jetën e qytetarëve tanë, veçanërisht të komunitetit serb, por ne jemi të aftë të ballafaqohemi me çfarëdo sfide, nga brenda apo jashtë,” përfundoi Sveçla.